У Беларусі з’явіліся новаўвядзенні для ўладальнікаў транспарту. Так, для іх пашырылі спіс паслуг ад МУС, якія можна атрымаць дыстанцыйна на партале «Е-Паслуга». Новаўвядзенне датычыць як фізічных асоб, так і кампаній і індывідуальных прадпрымальнікаў.
Адна з новых паслуг — дыстанцыйнае зняцце з уліку транспартных сродкаў. Гэтая опцыя цяпер прадугледжаная як для насельніцтва, так і для арганізацый.
Кошт-адна базавая велічыня (на сёння гэта 45 рублёў).
Для насельніцтва таксама з’явілася магчымасць дыстанцыйна атрымаць такую паслугу, як «абмен, выдача ўзамен згубленага (выкрадзенага) пасведчання кіроўцы». А яшчэ — такога дакумента старога ўзору з надпісам МУС СССР. Але ў гэтай паслугі ёсць абмежаванні. Па-першае, скарыстацца ёй не змогуць тыя, пра чые пасведчанні кіроўцы няма звестак у базе ДАІ. Па-другое, яна недаступная тым, каго пазбавілі права кіраваць транспартам.
Дзяржпошліна за выдачу пасведчання кіроўцы — дзве базавыя велічыні (90 рублёў), а пры замене гэтага дакумента пасля згубы або крадзяжу — тры (135 рублёў). Таксама давядзецца заплаціць за афармленне заявы — 0,08 базавай велічыні (3,6 рубля), за камп’ютарныя паслугі — 0,04 базавай (1,8 рубля).
Таксама з’явіліся і іншыя паслугі МУС, якія датычаць кіроўцаў і якія можна атрымаць дыстанцыйна.
Новаўвядзенні запрацавалі з 1 студзеня 2026 года.
Чытайце таксама
