Снежань вярнуў рынак нерухомасці Мінска да звыклай актыўнасці: угоды зноў пайшлі ўверх, а цэны зноў выраслі. Пры гэтым аднапакаёўкі патаннелі, а вялікія кватэры рэзка падаражэлі. Пра гэта паведамляюць эксперты агенцтва нерухомасці «Авангард».
Пасля невялікага падзення колькасці ўгодаў у лістападзе снежань паказаў больш звыклае значэнне ў больш чым 1200 падпісаных дамоваў пра продаж. Гэта на 6,7% больш, чым месяцам раней.
Між тым у параўнанні са снежнем мінулага года ўгодаў было на 7,9% менш.
Рост сярэдняй цаны квадратнага метра жылля ў Мінску па-ранейшаму не спыняецца. Новы месяц дадаў яшчэ 9 даляраў, або 0,5% — да 1972 даляраў за квадратны метр. Пакуль цана не дасягнула чаканых 2000 даляраў за квадрат. За год сярэдні кошт вырас на ўнушальныя 366 даляраў, або +22,8%.
У снежні сярэдняя цана квадратнага метра адчувальна падрасла толькі ў сегменце трохпакаёвых і чатырохпакаёвых кватэр.
Сегмент аднапакаёвых кватэр у снежні страціў 6 даляраў ад сярэдняга кошту квадрата ў параўнанні з лістападам і склаў 2112 даляра за метр. Нягледзячы на гэта, больш чым 2000 даляраў за квадрат у сегменце аднапакаёвак трымаецца ўжо чатыры месяцы.
Сегмент двухпакаёвых кватэр у снежні прыкметна прасеў у цане. 1875 даляраў за квадрат, што на 1,4% менш, чым у лістападзе (1901 даляр).
А вось сегменты трохпакаёвых і чатырохпакаёвых кватэр, наадварот, у снежні падраслі. Плюс 2,4% для першых і істотны плюс у 10,6% для другіх. Выніковыя значэнні ў снежні — 1802 і 1803 даляры адпаведна.
У снежні 47% усіх угодаў прайшло з аднапакаёвымі кватэрамі. Гэта тыповая сітуацыя для рынку нерухомасці Мінска.
Чытайце таксама
